Даскаловски- Советникот Витанов да ја преиспита одлуката за советничката коалиција со ВМРО ДПМНЕ

Неморалниот чин на еден поединец дека ја претставува волјата на граѓаните на Општина Струмица во најмала рака е манипулација без преседан, зошто на последните локални избори за советничката листа на СДСМ својот глас го дале 18.425 граѓани.

Ова го истакна на денешната прес конференција, претседателот на ОО на СДСМ во Струмица, Марјан Даскаловски, реагирајќи на прес-конференцијата на ВМРО ДПМНЕ кои рекоа дека го добиле советничкото мнозинство откако во нивни редови дојде советникот од ВМРО НП.

– Замислете волјата на 18.425 граѓани е погазена од само еден граѓанин, кој е член на Советот на општина Струмица, човек кој не бил на некоја независна листа, туку на листа на коалиција предводена од СДСМ, рече Даскаловски.

Побара од нивниот досегашен коалиционен советник, Методи Витанов да ја преиспита одлуката и, како што рече Даскаловски, да ја симне огромната дамка која самиот си ја ставил.

– Се поставува прашањето, како тоа, по безмалку четири години победничко мнозинство, на прагот на новите локални избори, господинот Витанов одлучува да го погази сето тоа што го сторил во изминатиот период, заедно со советниците на СДСМ. Ова е срамен чин и секој коментар би бил излишен, вели Даскаловски.