Струмица бара негувателки за градинки: 24.000 денари за девет месеци

Ако сте евидентиран невработен во Струмица и имате лиценца за негувател, Општина Струмица денеска, 2 ноември 2026 година, објави јавен повик за вработување. Станува збор за програмата „Општинско-корисна работа“, каде што се бараат вкупно четири лица за работа во две од градските градинки.

Позициите се распоредени во ЈОУДГ „Виножито“ и ЈОУДГ „Детска радост“. За да аплицирате, задолжително мора да бидете активен барател на работа и да поседувате важечка лиценца за негувател, издадена од Комисијата при Министерството за труд и социјална политика. Потребно е и завршено средно четиригодишно образование, без разлика дали сте завршиле гимназија, медицинско, музичко, ликовно или физичко училиште. Предност при изборот имаат лицата кои прв пат се јавуваат за учество во оваа програма.

Работното ангажирање трае девет месеци, со полн работен фонд од 40 часа неделно. Месечниот бруто надоместок изнесува 24.000 денари, во кој се вклучени данокот и придонесите. Важно е да се знае дека за време на ангажирањето го задржувате статусот на невработено лице, а ако примате паричен надоместок или гарантирана минимална помош, тие права остануваат активни.

Повикот е отворен за специфични категории, вклучувајќи долгорочни невработени, млади до 29 години, лица постари од 50 години, самохрани родители, родители на деца со пречки во развојот или на три и повеќе деца, како и припадници на ранливите етнички заедници. Пријавувањето се врши директно во Центарот за вработување во Струмица. Целосните услови и текстот на повикот можете да ги прочитате на официјалната страница на Општина Струмица.

Извор: Општина Струмица | Фото: Општина Струмица